ਅਮਰਨਾਥ ਧਾਮ ਜਾ ਰਹੇ ਸ਼ਰਧਾਲੂ ਨਾਲ ਵਾਪਰਿਆ ਭਾਣਾ, ਆਪਸ 'ਚ ਟਕਰਾਈਆਂ 5 ਬੱਸਾਂ; 36 ਜ਼ਖ਼ਮੀ

ਰਾਮਬਨ, 5 ਜੁਲਾਈ : ਸ਼ਨੀਵਾਰ ਨੂੰ ਜੰਮੂ ਦੇ ਰਾਮਬਨ ਵਿੱਚ ਪੰਜ ਬੱਸਾਂ ਦੀ ਟੱਕਰ ਵਿੱਚ ਘੱਟੋ-ਘੱਟ 36 ਅਮਰਨਾਥ ਯਾਤਰੀ ਮਾਮੂਲੀ ਜ਼ਖ਼ਮੀ ਹੋ ਗਏ। ਇਹ ਬੱਸਾਂ ਜੰਮੂ ਦੇ ਭਗਵਤੀ ਨਗਰ ਤੋਂ ਦੱਖਣੀ ਕਸ਼ਮੀਰ ਦੇ ਪਹਿਲਗਾਮ ਬੇਸ ਕੈਂਪ ਜਾ ਰਹੇ ਕਾਫਲੇ ਦਾ ਹਿੱਸਾ ਸਨ। ਹਾਦਸੇ ਬਾਰੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਹਾਦਸਾ ਜੰਮੂ-ਸ਼੍ਰੀਨਗਰ ਰਾਸ਼ਟਰੀ ਰਾਜਮਾਰਗ 'ਤੇ ਚੰਦਰਕੋਟ ਨੇੜੇ ਵਾਪਰਿਆ। ਉਨ੍ਹਾਂ ਕਿਹਾ ਕਿ ਇਹ ਹਾਦਸਾ ਇੱਕ ਬੱਸ ਦੇ ਬ੍ਰੇਕ ਫੇਲ ਹੋਣ ਕਾਰਨ ਹੋਇਆ, ਜਿਸ ਤੋਂ ਬਾਅਦ ਬੱਸ ਹੋਰ ਵਾਹਨਾਂ ਨਾਲ ਟਕਰਾ ਗਈ। ਜ਼ਖਮੀਆਂ ਨੂੰ ਤੁਰੰਤ ਡਾਕਟਰੀ ਸਹਾਇਤਾ ਦਿੱਤੀ ਗਈ। ਰਾਮਬਨ ਦੇ ਡਿਪਟੀ ਕਮਿਸ਼ਨਰ ਮੁਹੰਮਦ ਅਲਿਆਸ ਖਾਨ ਨੇ ਕਿਹਾ ਕਿ ਚੰਦਰਕੋਟ ਲੰਗਰ ਸਥਲ ਨੇੜੇ ਇੱਕ ਬੱਸ ਬ੍ਰੇਕ ਨਹੀਂ ਲਗਾ ਸਕੀ ਅਤੇ ਇਹ ਚਾਰ ਹੋਰ ਬੱਸਾਂ ਨਾਲ ਟਕਰਾ ਗਈ। ਕੁੱਲ 36 ਸ਼ਰਧਾਲੂਆਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਮਰੀਜ਼ਾਂ ਦਾ ਹਸਪਤਾਲ ਵਿੱਚ ਇਲਾਜ ਕੀਤਾ ਗਿਆ। ਸ਼ਰਧਾਲੂਆਂ ਦੇ ਅੱਗੇ ਜਾਣ ਲਈ ਵਿਕਲਪਕ ਵਾਹਨਾਂ ਦਾ ਪ੍ਰਬੰਧ ਕੀਤਾ ਗਿਆ ਹੈ।