مکھ منتری موہالی دے قومانتری ہوائی اڈا وکھے شہید بھگت سنگھ دا 30 پھٹّ اچا بتّ سمرپت کرنگے

  جگدیش تھند
چنڈی گڑھ 12 ستمبر
     پنجاب دے مکھ منتری بھگونت سنگھ مان 28 ستمبر نوں شہید بھگت سنگھ دے جنم دوس موقعے شہید بھگت سنگھ انترراشٹری ہوائی اڈا، موہالی وکھے شہید-اے-آزم دے 30 پھٹّ اچے بتّ نوں سمرپت کرنگے۔
شہید بھگت سنگھ دے بتّ دی ستھاپنا دا جائزہ لین لئی میٹنگ دی پردھانگی کردیاں مکھ منتری نے کیہا کہ مہان شہید دا 30 پھٹّ اچا بتّ گنمیٹل نال تیار کیتا گیا ہے۔ اوہناں آس پرگٹائی کہ ایہہ بتّ نوجوان پیڑھی نوں دیش دی سیوا کرن لئی پریرت کرن وچّ بہت سہائی ہووےگا۔ بھگونت سنگھ مان نے کیہا کہ ایہہ بتّ صوبہ سرکار ولوں مہان شہید نوں ڈھکویں شردھانجلی ہوویگی اتے سوربیر پتّ دی گورومئی وراثت نوں سدا قائم رکھن لئی سہائی ہوویگی۔
مکھ منتری نے کیہا کہ صوبہ سرکار دے انتھکّ یتناں صدقہ موہالی انترراشٹری ہوائی اڈے دا نام پہلاں ہی شہید بھگت سنگھ دے ناں 'تے رکھیا گیا ہے۔ بھگونت سنگھ مان نے اگے کیہا کہ ایہناں مہان شہیداں دے ناں 'تے ہوائی اڈیاں، یونیورسٹیاں اتے ہور اداریاں دا ناں رکھنا اوہناں دی گورومئی وراثت نوں قائم رکھن لئی بہت ضروری ہے۔ اوہناں کیہا کہ ایہناں سنستھاواں دا نام مہان قومی نیتاواں دے نام 'تے رکھن نال ساڈے نوجواناں نوں دیش پرتی نرسوارتھ سیوا لئی پریرت کر سکدا ہے۔
 مکھ منتری نے کیہا کہ شہید-اے-آزم بھگت سنگھ دی وچاردھارا دیش نوں درپیش ساریاں سمسیاواں دا حلّ ہے۔ بھگونت سنگھ مان نے کیہا کہ ایہہ بتّ دیش دے اندر اتے دنیا بھر توں ایئرپورٹ 'تے اترے پنجابیاں دی نوجوان پیڑھی وچ اس شہید دی شاندار وراثت نوں برقرار رکھن وچ اہم بھومکا نبھائیگا۔  اس دے نال ہی اوہناں کیہا کہ ایہہ بتّ ہریانہ، ہماچل پردیش، اتراکھنڈ، جموں-کشمیر اتے ہور راجاں توں آؤن والے یاتریاں نوں وی اس قومی نائک دوارا دتی گئی مہان قربانی دی یاد دواؤندا رہے گا۔
 مکھ منتری نے اگے کیہا کہ نوجوان شہید نوں نہ صرف اس دی بہادری لئی سگوں اس دے سماج واد دے فلسفے اتے انیاں ورودھ لڑائی لئی وی یاد کیتا جاندا ہے۔ اوہناں کیہا کہ شہیداں دا مہان جیون اتے فلسفہ نوجوان پیڑھی نوں دیش بھگتی دے جذبے نال دیش دی سیوا کرن لئی ہمیشہ پریردا رہے گا۔ بھگونت سنگھ مان نے دہرایا کہ صوبہ سرکار شہید بھگت سنگھ دے سپنے نوں ساکار کرن لئی وچنبدھّ ہے اتے اس نیک کارج لئی کوئی قصر باقی نہیں چھڈی جاوے گی۔